Man United-in point an hloh leh tawh

Premier League-ah Manchester United-in Ningani zan khan West Ham United an mikhual a, an goal khung an hum theih loh avangin 1-1 in an inhnehtawk. Ruben Amorim-a hoten point hnih an hloh a, table-ah pawh pariatnaah an tla thla. Red Devils hian December 8, Thawhelhni zanah Wolves hmachhawn turin Molineux an tlawh ang.

Crystal Palace hneh zo hlim Man United-in inrintawkna an ngah a, manager Amorim-a'n Eagles an hneh hram chungin starting XI a siksawi nasa. Matthijs de Ligt leh Leny Yoro te awltirin an aiah Ayden Heaven leh Noussair Mazraoui te an lut. Tlarhma lamah Matheus Cunha a rawn kirin Mason Mount-a'n hmun a kian.

First half-ah goal a lut lo a, Joshua Zirkzee leh Matheus Cunha te an vannei tawk lo. Second half-ah Diogo Dalot-a'n box chhungah ball changin striker class takin an tih ṭhin angin cool takin goal-ah a chantir. Table hnuai lama awm lakah Man United tan goal khat tawk tura ngaih a ni a, goal dang khung belh thei pawh an ni. Mahse, Cunha-a'n a hun ṭha neih goal-ah a chantir lo a, United-in an chance neih ṭhat an hlah an tuar.

Minute 83-naah Hammers-in corner kick hmang ṭangkaiin Soungoutou Magassa hmangin an sut. Mikhual team-in United tlarhnung an chhaih buai a, Amorim-a hote pawhin chance nei tho mah se goal a luh belh tawh lo. Point thum hmuh theihna tura point khat chauh an hmuh avangin United ṭantuten an player-te an au el a, hma sawn nia an inhriat hnua an tlak hniam leh duai ṭhin avangin an team-te khelh danah an lawm lo.