Caicedo tel lohna Chelsea

Premier League-ah Chelsea a zawnin vawi thum an chak a, match ruka vawi nga an chak theih avangin champion beiseina hial an nei. Mahse, hmahruaitu Arsenal an hmachhawn ṭumin Moisés Caicedo hnawhchhuah a ni a, midfielder pawimawh tel loin Gunners nena an inhnehtawk hnuah Leeds United lakah 3-1 in an mualpho.

London club hian match hnuhnung pahniha point nga an hloh avangin Arsenal nen an inkar pawh point kua zet a ni leh tawh a, Enzo Maresca hote hian insiamṭhat an mamawh. Blues hian zanin dar 8:30 hian Bournemouth an tlawh dawn a, Caicedo tel lo bawkin an khelh a ṭul dawn.

Hun rei tak inhliam vanga khelh theih loh hnuah Cole Palmer a rawn kir a, Leeds an hneh loh ṭumin bench aṭangin a rawn lut. Player pawimawh dang Wesley Fofana leh Reece James te Cherries an hmachhawn hunah squad-ah an awm theih tawh a beiseiawm bawk. Palmer dam tawh mah se tun dinhmuna Blues innghahna tur erawh Pedro Neto a ni thei ang.

Season bul ṭan ṭha Bournemouth pawh tun hnaiah an che ṭha bik lo a, match nga chhung chu chak hmel an hmu tawh lo. Cherries hian match hnuhnung pangaah point khat chauh an hmu a, table-ah pawh 14-naah an tla thla tawh a ni.