Napoli-ah Spalletti a kir dawn

Kum 33 hnua a vawi khat nana Serie A-a Napoli champion puitu, Italian coach Luciano Spalletti chu Naples khawpuiah a kir dawn a, mahse, a kir dan tur erawh Juventus coach angin a ni thung.

Pathianni zan dar 1:15-ah Napoli hian Juventus hi an mikhual dawn a, team pahnih hi table-ah inhlat viau angin lang mah se, an point hmuh zat a inthlauh loh avangin a hmuhnawm dawn.

Antonio Conte enkawl Napoli hi table-ah pahnihna ni mekin, hmahruaitu AC Milan nen point 28 ve ve an nei. Juve hi pasarihna daih ni mah se, Napoli an phak lohna hi point nga chauh a ni thung.

Hei vang hian match khat result-in team pahnih inkar hi point hnih lekin a sawr zim thei dawn tihna a ni a, Spalletti-a'n Juve tan beiseina thar siam turin a club hlui lakah hnehna chan ngei a tum dawn.

Hmangaih hmasa

AS Roma leh Inter Milan pawh lo enkawl tawh Spalletti hian kum 2021 khan Napoli hi zawmin, season hnih a cham a, 2022-23 season-ah khan Serie A champion nihpuiin, a chhuahsan zui.

Kum 66 mi coach hi a hnathawh avangin Naples khawpuiah ngaihsan a hlawh a, kum 33 hnua league nomawi chawipui leh theitu coach a nih avangin an dah sang hle.

Spalletti hian Napoli a chhuahsan dawn hian, "Napoli hi club ka enkawl hnuhnung ber a ni tawh ang - Italy-a club dang enkawl chu ka tan a harsa tawh dawn a ni," a ti a, Naples mipuiten mittui nen an thlah.

Italian coach hian Italy national team a enkawl zui. Mahse, Euro 2024-ah round of 16-a Switzerland ngam loin an tla a, World Cup qualifier-ah an result a chhiat zui bawk avangin June, 2025 khan ban a ni.

Derna Anka

Thla sarih liam ta maia Napoli lo chu a enkawl loh tur thu sawitu coach hi club talbuai Juventus-in October-ah an dawr zui a, Napoli a hmangaih thu a lo sawi tawhnate chu theihnghilin, Juve hi a zawm.

Spalletti hian Igor Tudor thlakin, Juve a enkawl hnuah league match li an khel tawh - vawi hnih chakin, vawi hnih draw an nei a, Pathianni zanah Juve an hneh chuan a lakah beiseina a sang sawt ang.

Napoli coach hlui chuan, "Naples-ah hian ṭhian tam tak ka nei a, he hmuna ka kir leh tur hi a lunglenthlak hle. Engtiangin nge he club hian min lo lawm let ang ka hre lo a, mahse, kei chuan ka hmangaih reng a ni," a ti!

Spalletti chhuah hnuah Napoli hian Serie A nomawi an chawi leh tawh a, champion puitu hi Antonio Conte a ni - Conte hi Juve coach hlui a ni a, Inter Milan a enkawl tawh bawk.

Point thum

Conte hian player a nih laiin Juventus tan kum 13 zet a lo khel tawh. Coach a nih hnuah pawh Juve hi enkawlin, season thum chhung a zawnin Serie A champion a lo nihpui tawh.

Italy coach ni tura a chhuah hnuah pawh Juve an champion chhunzawm a, mahse, Conte vek hian 2020-21 season khan Inter Milan enkawlin, season kua zet a zawna champion tawh Juve chelhin, Serie A nomawi a chawi zui.

Conte-a'n Italian football a hrechiang tawk tih a lang a, nomawi chawi zel turin theihna a nei tih a lang bawk - a club hlui lakah zahngaihna lantir a tum dawn bik lo.

Chelsea boss hlui chuan, "A pawimawh ber chu point thum inchuhna inkhel a ni, tih hi a ni. Juve hi ka zah em em a, mahse, point thum hlawhchhuah duh ve ve kan ni," a ti a, chak ngei an tum tur thu a sawi.