Messi-a'n nomawi a chawi leh ta

Lionel Messi telna Inter Miami chuan MLS Cup final-ah Vancouver Whitecaps 3-1 a hnehin an champion. Pathianni zing inkhelah hian Messi-a'n goal khung lo mah se assist ṭum hnih a nei a, Thomas Muller telna Vancouver an hnehna kawngah a pawimawh hle.

Chase Stadium-ah Vancouver defender Édier Ocampo-a'n minute riatna lekah an lamah a tilut. Vancouver lamin minute 60-naah Ali Ahmed hmangin si phurh sut mah se Miami lamin Rodrigo De Paul leh Tadeo Allende hmangin an khung belh a, goal hnih hi Messi siam ve ve a ni.

Inter Miami neitu zingah David Beckham a tel a, Manchester United legend hian kum 2007-a LA Galaxy a zawm khan a contract-ah man tlawm zawka MLS club neih theihna dan a nei tel a, £15.6mtd chauhin Miami hi a lei.

Inter Miami hi kum 2018 khan tlangzarah a ni a, kum 2020 aṭangin MLS an khel ṭan a, kum 2025 a nih meuh chuan United States-a nomawi hlu ber an chawi. An hlawhtlinna kawngah Messi a pawimawh hle.

Kum 2023 khan Ballon d'Or vawi riat dawng tawhtu Messi an la lut a, Barcelona tana a khelhpui ṭhin Sergio Busquets, Jordi Alba leh Luis Suarez bakah Argentina tana a khelhpui Rodrigo De Paul an laksak.

Miami hian nikum khan Supporters' Shield leh Eastern Conference title an la a, playoff erawh an khel pha ta lo. Kumin October thla khan kum 2028 thleng atan Messi hian contract a pawtsei a, Inter Miami hmabak a êng chho hle.

Messi hian Miami tan match 88 khelin goal 77 a khung a, assist vawi 42 neiin nomawi pali Leagues Cup, MLS Supporters’ Shield, MLS Eastern Conference Cup leh MLS Cup te a champion tawh a ni. Argentine forward hian MLS team nem bera chhal theih ṭhin kha team ṭha berah a hlangkai!