Krismas a hnai : Man City-in Arsenal an hnaih

Premier League title inum boruak a nung chho hle. Season bul ṭan ṭha Arsenal-in Inrinni zan tir lamah Aston Villa 2-1 in an hneh lo a, Pep Guardiola hoten hmahruaitu hnaih theihna hun ṭha bawhpelh loin an khingpui Sunderland 3-0 in an sawp.

Gunners an buai!

Arsenal-in kum 2004 hnuah Premier League nomawi an chawi leh tawh lo a, kuminah Mikel Arteta hoin nomawi chawi theihna hun ṭha an nei. Mahse, Krismas a hnai chho a, Gunners-in table chung berah dinhmun an sawhnghet thei lo.

Villa Park-ah Unai Emery hoten Matty Cash hmangin minute 36-naah hma an hruai a, Villa khel a nung ṭha. Bench aṭanga lut Leandro Trossard hmangin Arsenal-in minute 52-naah si phurh sut mah se Villa an huai zawk.

Emery hoten table chung bera awm Gunners an nawr ngam a, an huaisen rah sengin Emi Buendia-a'n injury time-ah pawh minute nganaah chakna goal a khung. Villa 2-1 in an chak a, Arsenal-in point thum an hloh. London club-in William Saliba leh Gabriel te awm loh an tuar hle.

Beisei nei City

Manchester City-in table chung lama awm tho Sunderland an hmachhawn a, Fulham laka goal nga khung thei team hian Black Cats lakah goal thum an khung. Cottagers lakah City-in goal li an chhuah a, Sunderland lakah an insiamṭha tawh - an cleansheet.

City tan Ruben Dias, Josko Gvardiol leh Phil Foden ten goal khat ṭheuh an khung a, player thar Ryan Cherki-a'n assist vawi hnih ngawt a nei. Erling Haaland-a'n goal khung lo mah se Black Cats tlarhnung tan a hnawksak a, Pep Guardiola tana chanchin lawmawm chu Foden che ṭha hi a ni.

Man City-in point hnih chauhin Arsenal an pha lo a, mah se Pep-a hote hian kar laihawlah Real Madrid a hmachhawn dawn a, kartawpah Community Shield kawltu Crystal Palace an tlawh dawn bawk. Gunners erawhin insiamṭhatna hun an nei a, Club Brugge (UCL) zawhah table mawngphaha awm Wolves an hmachhawn ang.