Mama'n national inelnaah medal la

Yonex-Sunrise 37th Sub-Junior (15 & 17) National Badminton Championship 2025-ah Malsawmhlua'n medal a hlawh chhuak a, Bhubaneswar, Odisha-a neih inelnaah hian a partner Aanayan Bora (Assam) nen Boy's doubles category ah silver medal an hlap chhuak.

December 1-6 inkara neih inelnaah Malsawmhlua (Mama) te hi seeded no.7 ni chungin an inlan a, hei vang hian round hmasa ber awlin, round of 32 aṭangin an ṭan - an match hmasa berah Chonvung Pochury leh Heloka Swu te inkawp chu 21-10, 21-10 in awlsam takin an hneh.

Round of 16-ah Parth Gawri leh Harsith te ṭangdun chu 21-17, 21-12 a hnehin, quarterfinal-ah 21-15, 17-21, 24-22 in seeded no 4, Akhil Reddy Bobba leh Nischal Chand-te inkawp an hneh zui - semifinal-ah pawh anni aia seeded sang tho, seeded no. 6 Jangjeet Singh Kajla leh Arnav Sharma te ṭangdun chu 21-19, 22-20 in an hneh.

Mama leh Aanayan ten inringtawk takin final an hmachhawn a, mahse, seeded no.1 Punith S. leh Pavan S. te ṭangdun lakah 19-21, 10-21 a tlawmin, silver medal-ah lungawi an zir ta a ni.

Serchhip P&E Veng naupang Mama hian National Ranking Tournament-ah gold medal pakhat (U15 boy's doubles), silver medal pahnih (U15 boy's doubles) leh bronze medal 1 (U17 boy's doubles) a lo la tawh a, national championship-ah erawh medal a lakna hmasa ber a ni thung - Mizo zingah national badminton championship (sub-junior & junior) a medal la thei parukna a ni bawk.

Mama hi Tata Trusts, NEIDA, PGBA leh Mizoram Badminton Associationte thawhhona, Mizoram Badminton Initiative phase 1 hnuaia badminton khel ṭan a ni a, PGBA-ah a inzir mek. MBA chuan an player hi an lawmpui thu leh, a aia sang zawk thleng tura an duh thu sawiin, duhsakna an hlan.