PSG an ti mai mai lo

Kar hmasaa AS Monaco laka an tlawm hnuah Paris St-Germain an insiamṭha lehnghal a, Luis Enrique-a team hian Inrinni zan khan an mikhual Rennes chu 5-0 ngawtin an sawp.

French club tan hian Khvicha Kvaratskhelia chuan goal hnih khungin, Senny Mayulu, Ibrahim Mbaye leh Gonçalo Ramos ten goal khat ṭheuh an khung bawk a, mikhual Rennes lamin a chhanletna tur an nei lo.

Rennes hi an centre back Jérémy Jacquet chu minute 74-naah hnawhchhuah a ni a, mahse, mikhual team tan chhuanlam erawh a tling lo. Player 11 ve vea an khelh laiin goal thum an chhuah tawh sa.

Treble champion PSG hi table chung berah erawh an la kir thei rih lo. Inrinni zanah vek hian hmahruaitu RC Lens chuan 2-1 in Nantes an hneh a, match 15 khelh tawhah PSG aiin point khatin an sang mek.

Lens tan hian Florian Thauvin chuan goal hmahruai khungin, Nantes hian Youssef El Arabi hmangin chhanglet mah se, minute 81-naah Wesley Said chuan goal khat a khung ve leh a, 2-1 in Lens an chak a, an hmahruaina an chhawm nung.