Goal khung ṭhulh lo Kane

VfB Stuttgart lakah Harry Kane hahdamtir ni mah se, bench aṭanga luhtir a nih hnuah goal thum a khung a, Bayern Munich chu khualmualah 5-0 ngawtin hnehna a chanpui.

Bayern hian mikhual khelmualah goal an khung hmasa a, minute 11-naah Konrad Laimer chuan goal hmahruai a khung. Mahse, Bayern-in Kane-a hmel an hmuh hma chu goal dang an khung lawk lo.

English striker hi minute 60-naah bench aṭanga luhtir niin, minute ruk hnu lawkah goal a khung nghal a, Kane ang thoa bench aṭanga lut Josip Stanisic chuan minute 78-naah a belhchhah.

Bayern-in 3-0 in hma an hruai der a, mahse, Kane-a'n a duhtawk lo. Minute 81-naah Stuttgart defender Lorenz Assignon chu a kuta ball a tawh fuh avangin hnawhchhuah a ni a, penalty a chawi zui.

Kane-a'n penalty hi petin, goal-ah a chantir a, hun tawp nan minute hnih chiah a awm tawh tih hnuah a belhchhah leh bawk - Bayern hi 5-0 in an chak a, Bundesliga-a an hmahruaina an sawh nghet.

Tottenham Hotspur striker hlui hian tun season inelna hrang hrangah match 22 khelin goal 28 a khung tling ta der a, England captain-in Ballon d'Or a dawn leh dawn loh chu team hlawhtlinnaah chiah a innghat tawh tih ngam a ni.