Amateur boxing chawisan kan tum - ROC chairman

Sailo Agencies - MIZBA Mega Boxing 2025 hi National Boxing Championship-a Mizoram aiawh tur thlanna a ni dawn. Amateur boxing hmanga India ram pum huap inelna hi kumin December 30 hian Noida, Uttar Pradesh-ah neih a ni ang.

Tun ṭum inelnaa Ring Officials Commission (ROC) chairman leh MIZBA treasurer Rosema Colney chuan, "Amateur boxing chawisan thar kan tum. Olympic Vision 2036 te kan nei a, chumi tih hlawhtlin theihna pakhat chu amateur boxing hi a ni thei ang. Amateur boxing hi Mizoram hming tih ṭhat nan bakah hna hmuhna ṭha tak a ni a, kan tih nun thar hi a pawimawh hle," tiin Vanglaini a hrilh.

Rosema chuan sawi chhunzawmin, "Olympic hmain National Boxing C'ship a hmasa a, India ramah kan chet ṭhat phawt a ṭul. Ram pum huap inelnaa kan chet ṭhat dawn chuan tualchhung inelna hi kan ngaih pawimawh a ngai. Mizo mipuite Mega Boxing thlir ṭheuh turin kan sawm takzet a ni," tiin a sawi.