Formula 1 champion thar Lando Norris
Lando Norris chuan a suangtuahna te chu a takah a chantir a, a vawi khat nan Formual 1 champion a ni ta - British driver zingah F 1 champion thei 11-na a ni ta chiah bawk.
Pathianni zana tlan zawh tak Abu Dhabi Grand Prix-ah Max Verstappen a tlan chak ber a, tun season chhunga a vawi riat nan chakin McLaren driver pahnih Norris leh Oscar Piastri te aiin a chak tam zawk hial.
Mahse, kum tluana inelna a ni a, intlansiak awm tur zawng zawng an tlan zawh hnuah Norris hian point 423 hmuin a sang ber, season hmasa champion Verstappen aiin point hnih chauhin sang zawk mah se nomawi chawi nan a tawk.
Intlansiak hnuhnung berah Norris hian champion turin mamawh a la nei nual, a elpui an chak phei chuan pathumna tal a nih phak a ngai. Verstappen chu a chak ta ngei a, mahse Norris hian champion tura a mamawh angin pathumna dinhmun a luah.
F1 season sarih a hman hnua champion ve ta Norris chuan, "Hun rei tak chhung chu ka ṭap tawh lo, ka ṭah leh theih pawh hi ka ring ngai lo. Mahse, Formual 1 champion nih chiah mai chu a boruak a danglam, lawm avangin ka ṭap.
"Tun season atan chuan Max leh Oscar te hi ka elpui lian leh hautak ber an ni a, kan sulhnu ṭha leh ropui te avangin ka lawmpui ve bawk. Max-a'n tun hmain tuna ka hun tawn ang hi a lo tawng fo tawh, a lawmna ang kha ka ṭawmpui ve thei ta.
"Ka tan season rei leh hautak tak mai a ni a, hniam leh san chang a awm, chutiang karah pawh chuan tlo taka ka kal theih nan team ṭha tak ka nei, an zarah tun dinhmun hi ka thleng thei ve chauh a ni," tiin McLaren chungah a lawm thu a sawi bawk.
Season tluan thlirkir chuan McLaren hi team ṭha leh nghet ber an ni a, car pawh an nei chak hle. Inelna boruak sang laiah Verstappen-a'n a tawnhriat neih a hmang ṭangkai thei hle a, driver mal ang chuan tal na thei ber ang hiala chhal theih a ni - a chak tam ber.
Amaherawhchu, kum laihawl leh ṭhenkhat laia Red Bull an che ṭha tawk lo a, an driver pakhat zawk Yuki Tsunoda chu team lian dang driver el tur leh lo dip buai turin a hnawk tawk lo, mimal chauh ni loin team anga chet ṭhat a pawimawhna a lang.