Super Cup-ah Goa an champion

Season hmasaa Super Cup champion FC Goa chuan an nomawi an humhim a, Thawhṭanni zan khan final-ah East Bengal an hneh - team pahnih hi hun pangngaiah 0-0 in an inhnehtawk a, penalty-ah 6-5 in FC Goa an chak zui.

Fatorda Stadium, Fatorda-a inkhelah hian East Bengal tan Lalchungnunga chuan inkhel bul ṭanin, striker David Lalhlansanga chu bench aṭanga luhtir a ni bawk a, danglamna erawh a thlen thei lo.

FC Goa tana inkhel bul ṭan zingah Ayush Chhetri a tel a, Dinthar tlangval hi season hmasaa champion Goan team-ah hian a lo tel tawh bawk.

Tun season Super Cup-ah hian ISL club 13 zingah Odisha an tel lo a, I League aṭangin club pali an tel bawk. Team 16 hi group paliah, team pali zel awmin ṭhen an ni. Group hmahruaitu ṭheuhin semifinal an lut.

Super Cup champion hian nuai 25 an dawng a, pahnihnain nuai 15 an dawng thung.