James leh Doncic hoin Lakers an chak

LeBron James leh Luka Doncic ten point 60 an nei a, an team Los Angeles Lakers chu Philadelphia 76ers lakah 112-108 in hnehna an chanpui.

James-a'n point 29 a nei a, hei bakah hian rebound vawi sarih lain assist ṭum ruk a nei bawk - a point neih zinga 12 chu hun pawimawh lai, quarter hnuhnung bera a neih a nih avangin a la pawimawh hle.

76ers pawh an khel chhe lo, hun tawp nan minute khat leh second 29 chauh a awm tawh tihah 105 an han nih rual a, chak zawk tur a chiang lo - hun pawimawh laiah tak hian James chuan a zawna point nga rawn neiin a team a chakpui a ni.

Fa neih vanga match hnih a khelh loh hnuah Doncic pawh a inlan leh thei tawh a, triple-double a nei leh nghal. Point 31 a neih bakah rebound vawi 15 lain, a ṭhiante basket neih tur vawi 11 lai a siamsak bawk.

Lakers hi Western Conference-ah pahnihna an ni mek a, chak lo Philadelphia 76ers erawh Eastern Conference lamah pasarihna an ni mek thung a ni.