Mumang rama cheng Crystal Palace

Crystal Palace captain Marc Guehi chuan hun tawp dawnah goal pawimawh a tauh lut a, a team Palace chu Fulham lakah 2-1 in a chakpui - Premier League table chung lamah an awm chhunzawm.

Season hmang ṭha tak mai Palace tan Eddie Nketiah chuan goal hmahruai a khung, English forward hian Adam Wharton hnen aṭanga a ball hmuh chu pet nuam tawk vela dang perin, a hlap lut.

Fulham lamin na tak takin an nawr let, midfielder Emile Smith Rowe chuan hun ṭha vawi hnih nei mah se an lo dan pialsak bakah goalkeeper Dean Henderson chuan a lo nem persak bawk.

Craven Cottage a nih avangin Fulham an ṭang na hle, chawlhlawk hma hretin Harry Wilson-a goal kan hmu. Goal an khung hma hian Raul Jimenez nen mawi zetin ball an inpe hmasa, chumi hnuah goal class tak a khung.

Alex Iwobi-a'n goal bar a tauh per chu Smith Rowe-a'n chakna goal atan khungah a inngai a, mahse goal luh hmain Alex Iwobi chu a lo offside avangin VAR hmanga endik a nih hnuah an hnawl.

Hun tawp dawn hnaiah corner aṭanga ball kal chu Guehi chuan a lo tauh lut a, goal dang a lut zui lo. Oliver Glasner-a naute hian point 26 hmuin EPL table-ah palina dinhmun an luah.