Juve hnehtu Napoli an sang ber

Serie A champion nih tumin team ṭha an inel na hle, champion lai Napoli chuan tun hnaia insiamṭha mek Juventus chu 2-1 a hnehin Italian football inelna sangah hmun chungnung ber an luah.

Pathianni zan khan Diego Armando Maradona Stadium-ah inkhel pawimawh a awm a, striker ṭha Rasmus Hojlund chuan goal hnih khungin a team a chakpui, season duhawm a hmang chhunzawm.

Minute sarihna lekah Rasmus Hojlund a inlar - Manchester United aṭanga loan hmanga an hawh hian David Neres siamsak chu a tlawh lut, awmna tur hmun dikah a hunah tak a lo awm rah a ni.

Second half-ah mikhual lamin counter attack aṭangin an vaw let a, attacking midfielder Kenan Yildiz chuan si phurh a sut. Team pahnihte point insem tura an lan laiin, a hunah tak Hojlund inlar lehin chakna goal a tauh lut.

Hojlund bakah hian Manchester United midfielder hlui Scott McTominay pawh a khel ṭha lehpek hle a, season hmasa khan McTominay hian a lo champion pui tawh bawk a, player pawimawh a la ni chhunzawm zel.

Napoli coach Antonio Conte chuan, "Goal kan khung dan kha uluk takin en ila, player zawng zawng an pawimawh vek tih in hmu ang. Ka naute hian nasa takin hma an sawn, team lian leh khauh tak laka an khelh dan hian min tilawm hle a ni," tiin a sawi.

Italian champion hian Serie A match 14 aṭanga point 31 hmuin hma an hruai a, an hnuaiah point 30 hmutu Inter Milan awmin AC Milan (28 points) leh AS Roma (27) te nen an la inthlau lo hle bawk.

Juventus coach Luciano Spalletti chuan, "Napoli defender pathum inkarah khan forward tal na thei tak dah a, chumi hmanga hun remchang insiam kha kan tum ber chu a ni a, kan duh angin kan tihlawhtling thei lo," tiin a sawi.

Lois Openda leh Jonathan David te aiin Kenan Yildiz chu tlarhma laiah a dah a, amah thlawp turin Francisco Conceicao leh Weston McKennie te a dah; goal khat khung mah se a dang erawh an sual chhuak zo ta lo.