Neymar hliam an zai dawn!

Football thiam bik zinga mi a ni a, a thiam a ni satliah lo - a hnuhnawm em em bawk. A vanglai erawh a rei dawn ta lo - Neymar chanchin kan hriat tharlam ber chu a khup hliam zai a nbgaih thu a ni leh ta.

Kum 33 mi Neymar hian a chawr chhuahna Santos tan Cruzeiro lakah minute 90 chhung a khel a, 3-0 a hnehna chanpuiin season tharah Brazilian Serie A khel zel turin an inhamtang bawk, tla thei dinhmuna ding hman kha a chhanchhuak.

Tun hnai khan Neymar chuan, "Hahchawlh ka mamawh a, ka khup hliam hi zai a ni ang," a ti a, engtiang taka hliam na nge a nih a, engtiang chen nge chawlh a mamawh dawn tih erawh a sawi tel rih lo thung.

Neymar hian Barcelona leh Paris Saint Germain tan vanglai a hmang a, nomawi pawh a chawi hnem. PSG aṭangin Al Hilal a zawm, hliam vangin Saudi Pro League club tan a inlan tam lo, thla 18 chhungin match sarih chiah a khel.

Kumin January khan Brazil ramah a kir a, a chawr chhuahna Santos a zawm. Santos tan pawh a inkhel tam tawk lo, hliam vangin a buai chhunzawm deuh reng, an match hnuhnung paliah erawh goal nga khungin Santos a humhim.

Neymar chuan, "Ka tan chuan chawlhkar nuam tak a nih rualin a harsa hle bawk. Santos leh ka ṭhiante tan ni lo se la chuan hetianga khup na chung hi chuan ka inkhel lo ang," tiin a sawi a, hliam dam chiang lo chungin match a khel lui a ni.

Brazil tan match 128 a khelh aṭangin Neymar hian goal 79 a khung tawh, world champion vawi nga ni tawh tan hian goal khung tam ber a ni. Mahse, kum 2023 October a Uruguay an hneh loh hnuah ram tan a la inlan leh lo.

Kumin Ocotober khan Brazil coach Carlo Ancelotti chuan World Cup 2026 khel tur chuan Neymar hi a rilru leh taksa 100% a inpeih a ngaih thu a sawi a, tun hnai khan Ancelotti hian Neymar chauh ni loin player dang zawng zawng pawh an inpeih a ngai tih a sawi bawk.

Hmanni mai kha chuan Neymar tan World Cup 2026 khelh beiseina a bo hman tawh niin a ngaih theih. Amaherawhchu, tun hnaia Santos tana a chet dan chhut chuan Brazil tana inlan turin a la ṭha tawk, a dam chiang thei ang em, tih chu zawhna lian tak a ni.

Neymar hian theihna sang tak a la nei reng a, ball pet leh pass pawh a la tidik thei hle. Mahse, a hliam avang hian defender paltlang a harsat tlat tawh, tun hma lama nuam ti taka amah vengtute a tlan san leh bum kual ang kha chu a thei tawh rih lo.

Inring tawk taka ball thunun a harsat rih a, a bik takin tharum hmanga an beih nasat chuan a buai zual ṭhin. World Cup 2026 khelh hmain hun a tam tawh lo, kum chanve pawh a awm tling tawh lo - Brazil tana inlan leh tumin a bei mek a ni a, a thei ang em tih chu hunin a la hril dawn a ni.