Torino hnehtu Milan an sang leh ta

Goal hnih an phurh hmasak hnuah AC Milan chuan Torino chu 3-2 in an lehthal - Serie A match 14 an khelh aṭangin Milan hian point 31 an hmu a, table chung berah an lawn kai leh ta a ni.

Thawhṭanni zan khan Olimpico di Torino, Turin-ah Milan an lenglut a, mualneitu lamin minute 10-na lekah Nikola Vlasic-a penalty hmangin goal hmahruai an khung a, goal luh aṭanga minute sarih hnuah Duvan Zapata chuan an goal hnihna a hlap lut leh bawk.

Milan an talbuai a, coach Massimiliano Allegri chuan hrem a tawh avangin khelmualah a naute a kaihruai thei si lo, assistant manager Marco Landucci hoin an mualpho rinna pawh a lian hman hle.

Mahse, Milan an buai rei lo. Midfielder Adrien Rabiot chuan hla deuh tak aṭangin goal ropui a khung, a ball channa a la hlat deuh avangin a shot mai pawh a la rinawm loh, mahse a insiamrem hnuah na takin a pet thut a, goal kilah lutin Milan beiseina a siamsak.

Second half-ah mikhual an phur a, na takin goal an nawr chhunzawm nghal. Box chhungah Christian Pulisic chuan awmna tur hmun a thlang dik a, a ke zawna ball tla duh ṭha taka a dawn hnuah a khung, si phurh a sut zo.

American forward Pulisic hian a la duhtawk mai lo. Minute 77-naah an goal thumna a khung, mual sir aṭanga ball rawn kal chu keeper Franco Israel rin loh lamah a pet a, lo khawih hman mah se a dangper zo tawh lo a, mikhual Milan an chak.

Milan assistant manager Marco Landucci chuan, "Torino khan min ngaichang nasa em em a, kan tihsual an chang, chumi hnuah na takin min vaw let ṭhin. A hnuah kha chuan inven dan kan thiam tawh a, kan chet fuh phah ta bawk a ni.

"Player zawng zawngin an theihtawp an chhuah, goal hnih kan chhuah hnu pawh khan tumah an beidawng duh lo. Penalty leh counter attack aṭangin goal kan chhuah a, a hnuah kha chuan khatiang remchang kha kan siamsak ta miah lo.

"Kan coaching staff leh doctor-te chungah pawh lawmthu sawi a ngai, a chhan chu kan player ṭha Pulisic kha inkhel leh thei tawh turin an enkawl dam. Player ṭha hi chuan hun pawimawh laiah danglamna an thlen ṭhin," tiin a sawi.

Milan hi an hnuaia mi Napoli nen an point a inzat - Naples club aiin Allegri leh a nauten goal difference an nei ṭha zawk a, an pahnih intawnah an chungnung zawk bawk avangin hma an hruai; Antonio Conte naute nen hian Serie A nomawi chu na takin an inchuh chhunzawm ang.