Champion lai PSG inlan hun

Champions League nomawi kawltu Paris Saint-Germain chu zanin dar 1:30 hian UCL match khel turin an inlan dawn a, Luis Enrique naute hi Athletic Bilbao khelmualah an lenglut ang.

PSG tana thu lawmawm chu Ousmane Dembele-a'n dam lam a pan leh ta hi a ni a, tun season UCL-a inkhel bul la ṭan miah lo forward hi zaninah chuan bul ṭan thei tura beisei a ni. Ballon d'Or kawltu a ni miau a, inkhela danglamna thlen turin theihna a nei.

Hetihrual hian Tottenham Hotspur laka hnawhchhuah Lucas Hernandez chu UCL match thum khel thei lo tura hrem a ni a, match thum chiah khelh tur an neih tawh bawk avangin UCL league stage-ah chuan a inlan tawh dawn lo tihna a ni.

PSG player zingah Desire Doue leh Achraf Hakimi te chu hliam vanga la inlan lo tur chiang an ni a, buaina erawh a tling lo ang.

Spanish club Bilbao damdawi in pawh a lun viau - Robert Navarro, Benat Prados, Unai Egiluz, Maroan Sannadi leh Inaki Williams te chu hliam vanga inlan thei lo tur chiang an ni a, Aymeric Laporte pawh a inlan theih a rinawm lo.

Hrem vangin centre back Aitor Paredes pawh a inlan thei dawn lo a, Bilbao hian an ṭhat dan berin PSG an mikhual thei dawn lo - Spanish club hi UCL match nga an khelh tawhah vawi khat chiah an la chak!

Round of 16 direct-a khelh chu sawi loh, knockout playoff hmanga beiseina nei turin hnehna chan a pawimawh a, Nico Williams-a tan mawhphurhna lak thiam a ṭul dawn tihna a ni.