Sorkarin sumin ISL pui dawn lo

Indian Super League hma hun a chiang lo chhunzawm zel a, India sorkar meuh a inrawlh hnuah pawh Indian top flight league hi eng tikah nge khelh a nih dawn a la chiang thei lo.

Hetiang boruak karah hian Sports ministry chu ISL khelh theihna tura sum leh paia AIFF pui mai tur anga sawi awm mah se, sorkar hian a sum ang zawng chuan puih tumna a nei lo niin phai media-te chuan an tarlang.

India rama sports thuneitu sang lam chuan ISL leh I League te chu khelh ngei a nih tur thu an sawi tawh a, hetihrual hian, "A sum ang zawng chuan puih theih a ni lo," tiin an sawi.

Nimin khan Supreme Court chuan ISL buaina chungchang hi a ngaihtuah a, he thu buatsaih a nih lai hian SC hian eng ang takin nge thutlukna a siam, hriat theih a la ni lo.

Tun hnai khan Indian Super League club 13-te chuan All India Football Federation (AIFF) hnenah lehkha thawnin, ISL chu club-ten huaihawt mai an hreh loh thu an thlen.

ISL club-te hian ISL enkawl tura pawl din a, AIFF leh commercial partner te nen thawk ho a, kalpui mai an duh tawh.

India rama club football inelna sang ber ISL hi kum dangah chuan September-ah khelh ṭan ṭhin a ni a, mahse, AIFF leh a thawhpui Football Sports Development Limited (FSDL) te thawh hona chu kuminah a tawp dawn a, hei vang hian ISL hi a buai ta a ni.