Atalanta khelmualah Chelsea an tlawm!

Champions League-a 3-0 ngawta Barcelona hneh theitu Chelsea chu an mang ram aṭanga kaih harhin an awm mek - inelna hrang hranga an match hnuhnung paliah an chak zo lo vek!

London club ṭantuten Barca meuh an hneh kha chuan beiseina an nei sang a, Champions League leh Premier League nomawi chawi kawp thlengin an mitthla hman - tunah erawh an beiseina a zam ral mek.

Blues hian Thawhlehni zan khan Champions League-ah Atalanta chu 2-1 in an ngam lo a, UCL match ruk an khelh tawhah vawi hnih an tlawmna chiah a ni.

Chelsea hian João Pedro hmangin goal hmahruai khung mah se, Gianluca Scamacca leh Charles de Ketelaere ten goal khat ve ve khungin an chhanglet a, 2-1 in Atalanta an chak.

Tun season-a Chelsea boss Enzo Maresca-a'n sawisel a tawh nasatna ber chu player siksawi a hrat lutuk chu a ni ber a, Atalanta lakah pawh player a siksawi nual.

Italian coach hian Bournemouth nena 0-0 a inhnehtawk team aṭangin player panga ngawt a thlak danglam - Leeds United laka 3-1 a an tlawm khan a hma chiah match aṭangin player panga tho a siksawi.

Cherries nena an in draw ṭum khan, Leeds laka khel aṭangin player paruk a thlak danglam leh a, tunah pawh a thlak danglam leh tawh - hetih chhung zawng hian an chak lo vek!

Atalanta lakah erawh Chelsea-in goal an khung hma a, minute 25-naah Joao Pedro chuan London club tan goal hmahruai hi a khung.

Mahse maw...

Blues-in goal an khung hma a, an beisei ang erawhin thil a kal vek bik lo. Atalanta goal nawr a na a, Chelsea tlarhnung tan Ademola Lookman chu hnawksak a tling.

Chelsea tan Reece James-a'n a chance neih a chhawr loh hnuah hremin an awm a, West Ham striker hlui Gianluca Scamacca chuan minute 55-naah si phurh sutna goal a khung.

1-1 a nih hnuah Blues tan Alejandro Garnacho chuan chance duhawm nei mah se, goal-ah a chantir thei lo a, minute 83-naah Italian club zawkin an khung belhchhah.

Charles de Ketelaere chuan Chelsea tlarhnungin an hnaih chilh vat lo chu hremin, goal hnihna a khung a, 2-1 a ni. Pedro-a'n Blues tan si phurh sutna remchang nei mah se, Atalanta keeper Marco Carnesecchi-a'n ṭha zetin a dang a, 2-1 in Chelsea an tlawm.

Maresca insawifiahna

Chelsea an tlawm a, inelna hrang hranga an match hnuhnung paliah vawi hnih tlawmin, vawi hnih draw an nei a, result duhawm lo a ni.

November thla tawpa league champion sawi ri hman kha table-ah pangana niin, hmahruaitu Arsenal chu point riat laiin an thlau tawh - UCL-ah an tlawm leh ta.

Player siksawi ngun tak Maresca-a'n sawisel a tawk nasa a, mahse, Chelsea boss chuan, "Zanina bul ṭan 11 zinga pariat emaw pakua vel emaw kha chu Tottenham Hotspur, Barcelona leh Arsenal laka khel an ni.

"Bournemouth laka player inlante nena khaikhin kha thil theih a ni lo a, zanina inlante kha match zawng zawng deuhthawa inlan player-te an ni," a ti a, a neih ṭhat ber hmanga Atalanta a hmachhawn thu a sawi.