Barcelona-in Eintracht Frankfurt an hneh

La Liga hmahruaitu Barcelona-in Champions League-ah pawh result duhawm an neih chhunzawm a, Chelsea laka an mualpho hnua UCL-a an match hmasa berah Eintracht Frankfurt chu 2-1 in an hneh.

Nou Camp-a inkhelah mikhual team-in goal an khung hmasa zawk a, minute 21-naah Ansgar Knauff chuan Barca barakhaihin, goal hmahruai a khung.

Mahse, October 2022 hnua Nou Camp-a Champions League match la khel leh lo Barcelona an insiamṭha vat a, bench aṭanga luhtir Marcus Rahsford a rawn tal hiar hle.

English forward hian minute 50-naah Jules Kounde-a goal khung tur a siamsak a, minute thum hnu lawkah Kounde vek hian an goal hnihna a khung leh bawk - hei erawh Lamine Yamal siamsak a ni thung.

Hun tawp thlengin goal dang a lut tawh lo a, 2-1 in Barcelona an chak a, automatic-a round of 16 lut turin Catalan club hian beiseina thar an nei ve leh ta.

Yamal-a'n record thar a siam bawk. Spanish forward hian Kounde goal khung tur a siamsak khan UCL-ah goal 14 a thawk chhuak tling ta chiah tihna a ni a, goal sarih khung tawhin, assist vawi sarih a nei - kum 18 hnuai lam player zinga UCL-a goal thawk chhuak tam ber a ni.

Kum 18 mi forward hian Kylian Mbappe record ding lai a khum ta chiah - Mbappe hian kum 18 a tlin hma khan goal 10 khungin, assist vawi thum a nei hman.

Barca hian tun season-ah UCL match ruk khel tawhin, vawi thum an chak a, vawi hnih tlawmin, vawi khat draw an nei - Frankfurt an hmachhawn hma hian UCL match hnih a zawnin an chak zo lo a ni.