Basel khelmualah Aston Villa

Zanin dar 1:15 hian Aston Villa chuan Europa League khel turin Basel an lenchilh dawn. Swiss club hian an khelmual hman thiam St Jakob-Park-a sulhnu ṭha an neih mek chu an chhawm nung thei ang em, tih chu zawhna lian tak a ni, a chhanna kan hmu dawn e!

Unai Emery enkawl Villa hi tun hnaiah an kaltluang hle, an match hnuhnung 15 aṭangin vawi 13 ngawt an chak; heng inkhelah hian match 10 zetah chuan goal hnih an khung tling vek bawk, zaninah pawh inrintawkna an nei sang hle ang.

Aston Villa hian an match hnuhnung berah Arsenal an hneh thei - Premier League hmahruaitu laka an result hian team ṭha an nihzia a lantir chiang viau a, European football erawh a boruak a danglam deuh ṭhin tih hriat a ngai ve bawk.

Defender ṭha Tyrone Mings leh Ross Barkley te chu malpui leh khup hliam vangin an la inkhel thei dawn lo a, anni pahnih bakah hian Evann Guessand chu a dinhmun a la chiang lo bawk.

Gunners laka goal khungtu Matty Cash a rintlak a, chutihrualin Lamare Bogarde an neih tho avangin Cash hi hahchawlhna hun an pe a nih pawhin a mak lo ang, kum 21 mi Bogarde hi inkhel ṭhenkhatah chuan chhawr tlak a ni.

Basel hi awlsam taka pal liam ngawt theih an ni dawn lo. Captain Xherdan Shaqiri chu a vanglai pel deuh tawh mah se a la rintlak - Premier League lama tawnhriat nei tawh midfielder hian, tun season inelna hrang hrangah match 25 khelin goal 11 a khung a, a ṭhiante khung tur vawi 10 a siamsak bawk; ani hi Villa tlarhnung tana ven uluk ngai tur bik a ni ang.

Zanin inkhel ngaihven hlawh zingah Nottingham Forest an tel. Premier League club hian Utrecht an lenchilh dawn - Netherlands club hi table mawngphah lama talbuai lai an nih avangin Forest tan dinhmun siamṭhat theihna remchang an nih a rinawm.