Sporting lakah Bayern an tho chhuak

Bayern Munich chuan second half-a minute 12 chhungin goal thum an khung a, chak lo thei dinhmuna an din hnuah Bavarians hian Sporting Lisbon chu 3-1 in an hneh.

Thawhlehni zan Allianz Arena-a inkhelah, mualneitu an chesual hmasa. An thiampuipa zinga mi Joshua Kimmich chuan anmahni lamah tilut palhin an hnufual hmasa a, mualpho thei dinhmunah an ding.

Mahse, Vincent Kompany leh a naute an tlawm duh lo, forward Serge Gnabry, rawlthar Lennart Karl leh Jonathan Tah te chuan minute 65 aṭanga minute 77 inkarah goal thum an khung, ropui takin hnehna an chang let a ni.

Goal khungtu zinga mi Karl tan chanchin lawmawm a ni, ani hi kum 17 leh ni 290 mi chauh a la ni a, European football inelna sang berah hian a zawna match thum chhung goal khung thei naupang ber a ni nghal chiah.

Man of the match atana thlan Karl chuan, "Kum 17 mi chauh ni chunga Champions League khelh theih hi ka ngaihlu a, ka ke dinglam hmang thiam turin theihtawp ka chhuah takmeuh a, chumi rah chhuah chu tunah ka hmu ta niah ka ngai.

"Player ṭha leh tawnhriat nei tam tak tak karah hun pek ve ka ni a, chumi ka chhawr ṭangkai thei chu ka lawm takzet a ni. A bul kan ṭan chho chauh a ni a, hmabak hlen chhuah tur thui tak kan neih hi kan tihpuitlin theih ngei pawh ka ring," a ti.

Bayern Munich hian season an hmang ṭha hle - Arsenal an ngam loh hma kha chuan tlawm nei loin season an hmang; Gunners laka an tlawm hnuah pawh ṭha takin an tho chhuak leh nghal thei a, UCL league phase match hnih khelh hmabak an la neihah pahnihna dinhmun an luah mek.

German champion Bayern Munich head coach Vincent Kompany chuan, "Sporting hi team ṭha an ni, an ṭha tih fiahna chu Champions League table en hian a chiang, a siang zual pariat zingah an awm thei tlat.

"Goal kan phurh lai pawh khan kan chiai duh lo a, ka naute hian hun harsa an lo paltlang fo tawh avangin an chungah rinna ka nghat ngam, khelmual sir aṭangin mipui puina an dawng ṭha bawk," tiin a sawi, an hmabakah chak zel an tum tih a sawi bawk.

Kar tawpah chuan Bundesliga an ngaihtuah a ngai leh thung dawn - Pathianni zan dar 10:00 hian Mainz an mikhual zui leh dawn a ni.