Marseille chakna Greenwood

Mason Greenwood chuan a thiam a la theihnghilh lo - Manchester United forward hlui hian a club khelh mekna Marseille tan goal hnih khungin Union Saint-Gilloise chu 3-2 in an hneh.

Thawhlehni zan Champions League inkhelah, mualneitu Saint-Gilloise chu a chefuh hmasa zawk niin minute ngana lekah goal an khung ṭan - Anan Khalaili chuan box pawn aṭangin a ke vei lamin a khung.

Igor Paixao-a'n goal kilah khung vein an si phurh a sut a, chawlhlawk hma hretin Greenwood chuan an khingpui tlarhnung a paltlang; Arsenal striker hlui Pierre-Emerick Aubameyang nen ball an inpek hnuah khungin, 2-1 in hma an hruai.

Second half-ah Greenwood chuan Matt O'Riley hnen aṭanga a ball hmuh chu an goal thum nan a khung a, hun tawp dawn lama Khalaili-a goal khungin awmzia a nei tawh lo, mikhual zawkin point thum an hlawh chhuak.

Ligue 1 club Marseille hian tun season UCL match ruk an khelh aṭangin vawi thum hnehna an chang a, vawi thum bawk an tlawm thung - an hmabak chu Liverpool an ni tawh dawn a, nakkum January 21-ah an inkhel ang, chumi hnuah Belgian club Club Brugge an la tum leh dawn a ni.