Boxing hmasawn nan sorkarin theihtawp kan chhuah ang - Home Minister

Sailo Agencies Mega Boxing 2025 kharna chu December 10, Nilaini zan khan R. Dengṭhuama Stadium, Mualpuiah neih a ni a, khuallian home minister K. Sapdanga chuan boxing hmasawn nan sorkarin theihtawp an chhuah tur thu a sawi.

K. Sapdanga chuan, "Boxing hi Mizoten kan tui a, national level-ah pawh kan hming lan tawhna a ni. Mahse, senior level-ah champion kan la nei chiah loin ka hria a, kan ṭan lehzual a ṭul," tiin a sawi a, National Boxing Championship-ah Mizo mipa zinga gold medal la an la awm lo.

Khuallian chuan sawi chhunzawmin, "Sorkar lamin infiamna lama hma kan sawn nan Empowering Mizoram Sports Programme a kalpui dawn a, hetah hian boxing a tel. Lo tawng sang zawkte tih dan angin a bul aṭanga hrut chhoh kan tum a dawn a, chu chuan nasa takin Mizoram boxing hi a chawisan kang ring. Sorkar lam pawhin boxing hmasawn nan theihtawp kan chhuah ang," tiin boxing tana sorkar a inhawng thu a sawi.

A hlawhtling

Mega Boxing-ah hian category 11 an awm a, hmeichhe category pali leh mipa category pasarihah ṭhen niin boxer 200 chuang an tel. Tun hnaiah amateur boxing-in ngaihven a hlawh tawk lo a, MIZBA-in Mega Boxing huaihawtin amateur boxing-in ngaihven a hlawh sawt.

Tun ṭum inelnaa che ṭha hi National Boxing Championship-a Mizoram aiawh tur thlanna a ni a, inelna ṭha tak an hmachhawn avangin kum tawpa neih tur India ram pum huapah pawh an chet ṭhat sawt a beiseiawm.

Chutihrualin Mizote infiamna ngaihnat boxing-in final zan khata bout nga a awm tling chungin R. Dengṭhuama Stadium a khat zo lo a, hmasawnna hmuh tur a awm. Tun ṭuma boxer inlante hian India ram pum huap inelnaa an chet ṭha chhunzawm a nih chuan Mega Boxing vawi hnihnaah chuan R. Dengṭhuama Stadium leng lo mipui an pung khawm tawh ngei ang.