Bernabeu-ah City an chak e

Real Madrid tan khua a var thei lo - Santiago Bernabeu-ah an mikhual Manchester City chu 2-1 in an hneh lo a, coach Xabi Alonso dinhmun a derthawng ta hle.

Madrid khaw club hian City lakah Rodrygo hmangin goal hmahruai an khung a, mahse, Nico O'Reilly leh Erling Haaland (penalty) ten City tana chhangletin, 2-1 in inkhel a tawp.

Real hi inelna hrang hranga an match hnuhnung pariatah vawi hnih chiah an chak a, vawi thum an tlawm a, vawi thum an khingpui an inhnehtawkpui - Real ang club tan a ṭha tawk lo.

Spanish club hi La Liga-ah pahnihna ni mekin, hmahruaitu Barcelona chu point liin an phak lo mek a, UCL-ah top 8 chinah la inhamtang mah se, an inhamtanna hi goal difference chauh a la ni!

Hello Bernabeu

Real-in an thiampuipa Kylian Mbappe chu hliam tenau vangin an chhawr thei lo a, bench lamah erawh an dah hram - Mbappe tel lohna Real tlarhma a hriam tawk lo.

Mahse, inkhel ṭantir lamah City hi an vannei teuh hle. Minute hnihna lekah Matheus Nunes chuan Vinicius Jr titluin penalty a chawi a, mahse, video assistant referee (VAR) a inrawlh vat.

Referee-in VAR a rawn hnuah freekick zawk a pettir a, City an vannei. Mahse, he freekick hi Federico Valverde chuan a chhuih lut teuh hle - uiawm takin a out a, City an vannei nawn!

Pepe Guardiola naute an insiamṭha vat a, inkhel an thunun zui. Mahse, Real bawk an hlauhawm chhunzawm a, minute 28-naah Rodrygo chuan Jude Bellingham siamsak aṭangin goal hmahruai a khung a, March hnu lama goal a khung leh hmasak ber a ni.

A tawp lo!

Real hmahruai chhung erawh a rei lo thlawt - minute sarih hnu lawkah City-in chance pangngai an neih hmasak bera chhal theih chu Nico O'Reilly-a'n goal-ah a chantir a, 1-1 a ni.

Bernabeu-a inkhel an ni miau a, Real fans thawm a reh phah lo. Mahse, minute 43-naah Spanish club a hnufual zawkah an ṭang a, an stadium hmingthang meuh pawh a reh ṭhuap!

Real centre back Antonio Rudiger chuan Haaland a titlu a, penalty a chawi. Norwegian striker hian harsatna nei loin goal-ah a chantir a, tun season-ah match 21 a khelh aṭanga goal 21 a khungna chiah a ni.

City-in 2-1 a hmahruai chungin chawlhlawk an hmang a, second half-ah Real hian si phurh sutna remchang nei mah se, Bellingham-a'n a chance neih a chhawr lo a, Endrick-a'n uiawm takin bar a tihper bawk.