Champion lai PSG an chelh

Champions League nomawi kawl mektu Paris Saint Germain chu an mikhualna ramah Athletic Bilbao nen goal awm lo, 0-0 in an inhnehtawk a, inkhel thunun mah se goal an khung loh avangin point khatah an lungawi a ngai.

San Mames, Bilbao-a inkhelah Paris club hian 71% teh meuh ball an chang a, goal khung tumin target zawnah vawi riat an pet laiin mualneitu lamin goal zawna pet pawh an nei miah lo.

PSG manager Enrique chuan, "Mi ṭhenkhat chuan harsa vak loa chak turin min ngai a ni mai thei, a awlsam lohzia chu a takin kan hmu. Inkhel pumpui thlir erawh kha chuan chak tumin kan bei ngam zawk a, chak phu zawk kan ni pawhin ka hria.

"A sang zual pariat zinga tel phak chu kan thil tum a ni a, tunah hian kan match hmabak pahnih aṭang hian vawi khat tal kan chak a ngai dawn, hna awlsam a ni dawn lo," tiin a sawi a, playoff khel turin an dinhmun ṭha tawh mah se hmabak erawh an la nei.

Spanish manager Enrique enkawlna hnuaiah PSG hian season hmasa khan Ligue 1 leh UCL an la kawp a, kuminah hian nomawi humhim tur chuan hna a hautak dawn; UCL bikah hian Sporting Lisbon leh Newcastle United an la tum ang.