WTA leh Mercedes thawkdun dawn

Hmeichhe tennis thuneitu sang Women's Tennis Association chuan Mercedes-Benz nen inremna an neih thu an sawi a, an inremna hi hmeichhe infiamna huangah chuan sum chet vel tamna ber a ni ang.

German car siam chhuaktu Mercedes-Benz hian kum 10 chhung chu WTA hi an thawhpui dawn a, kum khatah pound maktaduai 37.5 an pe chhuak ang a, an pawisa hi hmeichhe tennis hmasawn nan leh buaipui nan hman tur a ni ang.

An inremna pumpui hi pound maktaduai 375 hu a ni daih dawn a, tun hma lama hmeichhe infiamna lama sum chevel nen chuan a inthlau dawn hle. Kum 2023 November khan National Women's Soccer League in America chuan media right chu pound maktaduai 180-in an lo hralh tawh a, kum li chhung atan a ni.

Hmeichhe football league hrang hrangah Nike chuan pound maktaduai 262 hu inremna an nei a, heng inremna lian pahnihte hi WTA leh Mercedes-Benz te hian an rawn khum chiang hle.

American tennis player ropui ni ṭhin, a hnua WTA dintu leh president hmasa ber ni bawk Billie Jean King chuan, "Hmeichhiate tan infiamna huangah pawh kawl a êng zual zel, hlawh inang pek an nihna hian kawng hrang hrangin hmasawnna a thlen bawk," a ti.

Mercedes hian kum 1996 aṭanga 2008 chhung khan mipa tennis an lo thawhpui tawh a, hei bakah hian US Open chu an thawhpui bawk. US Open hi Grand Slam pali zinga lawmman an sem chhuah tamna ber a ni hial.

Mimal zingah Roger Federer leh Sloane Stephens te chu Mercedes tan ambassador an lo ni tawh a, tunah French Open champion Coco Gauff chuan he dinhmun hi a rawn luah ve leh ta chiah a ni.