Dan rual loh Thunder

Oklahoma City Thunder chuan NBA season bul an ṭan fuh ber an tawng a, tun hma lama match hmasa 25 a vawi 24 lai an chak recrod lo awm tawh chu an nihrual ta chiah - nimin zing khan Phoenix Suns 138-89 in an hneh.

Kum 2015-16 season khan Golden State Warriors chu an match hmasa 25 zinga pakhatah chiah an tlawm, basketball inelna ngaihhlutah Golden State hian record an nei ṭha ber, tunah Thunder hian an rawn nih rual ta a ni.

NBA champion lai Thunder tan hian, nikuma an champion theih nana thawhhlawk tak Shai Gilgeous-Alexander chu a ṭangkai hle a, Most Valuable Player nilai hian point 28 a nei.

Paycom Center-ah Gilgeous-Alexander hian lawm a hlawh hle, a zawnin match 96 chhung tehmeuh chu point 20 a nei tling ta zaih a, atan chuan nimin zing NBA Cup quarterfinal hi chhinchhiah tlak a ni chiang hle.

Thunder forward Jalen Williams chuan, "Hnehna chan hi chu engtik lai mahin ngaia neih theih a ni ngai lo, a nuamin a hlimawm em em zel a, tun ṭumah pawh hian match danga kan chak nen a inang lem lo," tiin a sawi.

Kum 2024-25 season aṭanga chhutin Thunder hian regular season match 107 an khelh zinga 92 laiah hnehna an chang thei a, season hmasa khan Western Conference hmahruaitu niin vawi 68 an chak tling.

Regular season bika chak tam ber chu Golden State niin, kum 2015-16 season khan vawi 73 lai an chak; kuminah Thunder hian Warriors record lo siam tawh hi tluk an tum ngam ang, hmabak hlenchhuah tur erawh a la thui hle.

Nimin zing khan Crypto.com Arena-ah San Antonio Spurs an inlan thung a, anni hian Los Angeles Lakers chu 132-119 a hnehin NBA Cup khelh laiah hian semifinal an lut ve bawk.

NBA Cup hi regular season chhunga mi a ni a, hnehna an chan hote pawh hi regular season atan chhiar a ni. Nikum khan Thunder hian final an lut a, mahse inkhel pawimawhah Milwaukee Bucks an ngam lo.