Beiseina neitu Juventus

Juventus chuan Champions League knockout stage khel ngei turin thapui an thawh chhunzawm. Nilaini zan khan Old Lady hian Cypriot club Pafos chu 2-0 a hnehin point thum hlu tak an hlawh chhuak.

Allianz Stadium-a inkhelah, rin loh takin mikhual Pafos chuan goal an khung hmasa teuh hle - Andrea Cambiaso chuan anmahni lamah a tilut palh teuh takzet a, goalkeeper Michele di Gregorio-a'n a lo chhan thei hlauh.

Pafos hian nikum khan an ram league nomawi an chawi a, a vawi khat nan Champions League an khel; an tan chuan tawnhriat nei ṭha Juventus danchah reng a harsa, second half-ah an inveng seng ta lo a ni.

Turin club hian Weston McKennie hmangin goal an khung a, goal a luh theih nana McKennie-a ball petu Cambiaso chuan fak a phu. A hnu lawkah Jonathan David chuan counter attack aṭanga an vuak letna hmangin an goal hnihna a khung bawk.

Italian club Juve manager Luciano Spalletti chuan, "Vannei takin kan chak, hna thawh hmabak tam tak kan la nei tih pawh a chiang. Chawlhlawk lai khan khelh dan ohung thak tur hrang hrang kan sawi, a chhanna chu a hnuah kan hmu.

"Ball chan lai chuan ṭha takin kan ti mai a, kan khingpui lamin ball an chan laia inven dan leh chhuhsak leh thuai dan kan zir chhuah a ngai, vawi khat atan chuan hmasawn nghal hluai theih a ni lo, zawimuangin kan che ang," tiin a sawi.

Juventus hian match ruk an khelh aṭangin point kua an hmu a, team 36 inel zingah 17-na an ni mek; league phase an khelh turah Benfica leh AS Monaco te an la hmachhawn leh dawn a ni.

Tun hmain Juventus hi an lo ropui tawh ṭhin. Kum 1985 khan European Cup an la a, kum 1996 khan Champions League nomawi an la leh bawk. Tunah erawh champion beisei awm zinga mi an ni phak rih lo. Serie A lamah pawh pasarihna ni mekin, hmahruaitu leh champion lai AC Milan leh Napoli te chu point sarihin an phak lo mek a ni.