Arsenal tlawh tur Wolves an buai

Premier League table-ah an hniam ber a, nipui laia player an lahluh danah Wolves thuenitute ngaihdan a inhmu lo. Team talbuai lai hian zanin dar 1:30 hian EPL hmahruiatu an tlawh dawn, an chung bera awm leh hnung dawltu an intawng dawn tihna a ni.

Mikel Arteta enkawl Gunners-in season an hmang ṭha a, tun hnaiah tluk zauh nei mah se an nghing nasa lo. Wolves erawh EPL match 15 aṭanga point hnih chauh hmu thei an ni a, an buai takzet tih chu zep theih a ni lo.

Wolves technical director Matt Jackson chuan nipui bazara hun an hman dan dik lo an tuar niin a sawi a, heihlai hian ban mai theih dinhmuna ding executive chairman Jeff Shi pawhin fans lungawi lo chu a hriatthiam pui thu a sawi bawk.

Nipui bazar lai khan Wolves hian Matheus Cunha leh Rayan Ait-Nouri te chu Manchester United leh Manchester City-ah an hralh a, captain Nelson Semedo chuan a contract hmang zoin man nei loin a chhuak bawk a ni.

Hetih laiin Wolves hian player paruk - Fer Lopez, Jhon Arias, Tolu Arokodare, David Moller Wolfe, Jackson Tchatchoua leh Ladislav Krejci te an lalut a, anni ho hian Premier League tawnhriat an nei lo.

Jackson chuan, "Player kan lakluh laia an boruak leh chet vel dan kha chu sawi theih a ni tawh lo, match hetiang zat kan khelh hnua point hnih chauh ka la hmuh avang erawh chuan thutlukna kan siam dik lo tih chu a hriat.

"Inkhel bul ṭan tura kan thlan apiang mai an fuh lo zel a, kan naute hian nakinah an theihna ti pungin an la ṭha ang tih chu ring mah ila, tunah hi chuan kan ṭha tawk lo a ni," tiin a sawi, a naute chungah rinna a nghat zo tawh lo.

Wolves hian hmanni lawk kha chuan Raul Jimenez, Diogo Jota, Joao Moutinho, Adama Traore leh Pedro Neto te an kawlkhawm ṭhin, tunah erawh an player ṭha leh langsar zingah chelh theih an nei tawh lo tiin a sawi theih.

Executive chairman Jeff Shi chuan, "Player kan chhuahtir tam lutuk a ni, kan player rinrawl 50% vel kan tih danglam a ni a, inelna hautak Premier League atana insiamrem leh nghal chu a harsa a ni," tiin a sawi a, ani hi fans lamin bang turin na takin an nawr mek a ni.

Pathianni zana an inkhelna tur hi Emirates Stadium a nih avangin Wolves hi buk rit lo zawk an ni dawn. Gunners hian an league match hnuhnung berah Aston Villa an hneh lo a, krismas laia hmahruaitu ni tur chuan insiamṭhat ngah an mamawh - zaninah chak ngei an tum ang.