Mizoram team-in Agartala an pan

79th National Football Championship for the Santosh Trophy 2025-26 group stage khel turin Mizoram team chuan nimin khan Aizawl chhuahsanin inelna neihna tur Agartala, Tripura an pan. Mizoram hi group D-ah Manipur, Mizoram, Nagaland leh Tripura te nen an awm ho a, group khat aṭangin pakhat chauhin final round an lut ang.

Coaching Staff

Mizoram coach hi Lalruatliana Sailo (Tawia) a ni a, MPL12 khelh zawh takah khan Tawia hian MLS FC enkawlin semifinal a thlenpui. Tawia kaihhruaina hnuaiah Mizoramin training an nei ṭha a, coaching staff thawhhona a ṭha.

Santosh Trophy-a Mizoram champion ṭuma manager Lalbiakzuala'n (Bza) tun ṭumah hian manager hna a thawk leh a, assistant coach-ah C. Lalduhawma a awm. Lunglei tlangval Doma hi MPL khelh zawh takah SYS FC assistant coach a ni a, tun ṭumah hian a vawi khat nan Mizoram team-ah goalkeeper kaihruai tur bik goalkeeping coach hruai tel a ni.

Mizoram goalkeeping coach hi C. Vanlalchhuanga a ni a, Machhuanga hi Mizo zinga goalkeeping licence nei awmchhun a nih bakah Mizoram Police coaching staff zingah telin tualchhung player a hrechiang hle. Assistant manager Elbethel L Zadeng hian Sports Management degree a nei a, MFA match commissioner exam a paltlang hnuah MPL8-ah khan MC hna a thawk. Kulikawn pa Ela hian AIFF D Licence a nei tel bawk.

Player 20 chauh

Santosh Trophy-ah hian ṭum dangah player 22 an awm ṭhin a, kuminah erawh player 20 chauh a hruai theih avangin coaching staff tan a harsa sawt dawn. Group stage-ah hian match thum chauh khelh tur ni mah se hliam/hrem an awm erawh chuan coach tan a harsa lehzual ang.

Mizoram hian match hmasa berah Nagaland an hmachhawn dawn a, group D bik hi December 15, Thawhṭannia khelh ṭan tur a ni. Match hnihnaah inelna thlengtu Tripura an hmachhawn dawn a, match tawp berah team ṭha Manipur an hmachhawn ang.

Engtin zel?

Mizoram team an naupan rual ber ṭum a ni a, Mizoram aiawha vawi khat kalna an awm nawk bawk. CYMA Football 2025-a best goalkeeper RS Lallawmzuala'n captain hna a chelh dawn.

Player 20 zingah MPL player 19 an tel a, Luangmual FC-in Robena an thawh ve bawk. Melbuk tlangval hi First Division aṭanga tel awmchhun a ni a, a tikimtu satliah ni loin bul ṭan thei tur zinga mi a ni.

Tlarhnung lai ding turin F. Lalchhanchhuaha, Lalbiakzuala leh Lalhmangaihsanga te an awm a; F-a leh Hmangaiha te hi vice captain ni ve ve mah se bul ṭan turin a chiang lo. MLS defender BZ-a hi an training hnuhnung lam thlirin bul ṭan thei dinhmunah a ding.

Midfield lamah Kiran Chhetri-a'n hmun pawimawh a chan a rinawm a, tlarhma lamah MPL12-a goal 12 khungtu Suanngaihmuana a awm. Amuana bakah Lalthanzuala, Lalnunzira Sailo, HC Willis Bynha, C. Ramnunpuia leh Freddy Lalrinkima te an awm a, coach Tawia tan duh thlan harsa khawp a ni thei ang.