Champion tum ngam Manchester City

Manchester City-in season liam taah nomawi an chawi lo a, kuminah pawh season bul ṭan ṭha lo mah se club dang an chet ṭhat bik loh avangin Premier League nomawi beiseina an nei lian leh tawh hle. Pep Guardiola hote hian point hnih chauhin Arsenal an pha tawh lo a, kumin chhung ngeia table chung bera awm an tum dawn.

City hian kar laihawlah Real Madrid an hneh a, Pathianni zan dar 7:30-a Crystal Palace an hmachhawn hunah inrintawkna an ngah dawn. Pep-a hote goal khung an harsat lo a, match hnuhnung 11-ah goal 27 an khung. Mahse, City tlarhnung a phui lo - match 11-ah hian Liverpool leh Sunderland an hneh ṭum chauhin clean sheet an nei a, goal 12 an chhuah.

Pep Guardiola hian nimin lamah mimal harsatna avangin press conference a hmachhawn thei lo a, a aiah Kolo Toure a ṭhu thung. Chutihrualin Pep hian Selhurst Park-ah erawh team a ho thei dawn. City tlarhma Erling Haaland, Phil Foden, Rayan Cherki leh Jeremy Doku te tun hnaiah an che ṭha a, Palace tan tlarhnung ven ṭhat a ṭul dawn.

Eagles hian Manchester United an hneh loh hnuah match thum a zawnin an chak leh tawh a, City tan tun season-a Premier League champion lai Liverpool ṭum thum hneh thei Palace zuam ngawt a rem lo ang.