Chelsea-in chak dan an theihnghilh?

Chelsea-in November thla tawpa Barcelona 3-0 a an hneh hnuah match li khel leh tawh mah se chak hmel an hmu tawh lo. Blues hi Arsenal leh Bournemouth nen an inhnehtawk a, Leeds leh Atalanta lakah an tlawm. Enzo Maresca hoten chak an harsat a, zanin dar 8:30 hian Premier League-ah Everton an mikhual dawn.

Blues hian kar laihawl khan Champions League-ah Atalanta an mikhual a, Joao Pedro hmangin goal khung hmasa mah se second half-ah inlehthal tirin 2-1 in an chak lo. Enzo Maresca hote hi tun hnaiah an result ṭha tawk lo mah se hmahruaitu Arsenal point riat chauhin an pha lo a, palina an phak lohna pawh point khat chauh a ni. Blues hian Stamford Bridge-ah Everton lakah record an nei ṭha a, match 30 chhung an tlawm tawh lo.

Chelsea tan Toffees hi tun hnaia an record ṭha lo thai chhiatna hun ṭha a ni a, chutihrualin an chak lo a nih chuan a sang paruk zingah an tel dawn tawh lo. Enzo Maresca-a'n pressure a ngah sawt ang a, tun hnaia an result ṭha lo avangin FIFA Club World Cup nomawi chawipuitu manager dinhmun pawh a derthawng hial ang.