Basel hnehtu Villa coach Emery a lungawi

Aston Villa chuan an mikhualna ramah Basel chu 2-1 in an hneh a, tun hnaiah an match hnung pariat laiah hnehna an chang fai vek - Unai Emery chu a naute khelh danah a lungawi hle.

St. Jakob-Park hi a lian hran lo, Ningani zan Europa League a hmuna entu pawh 27,509 an ni. Mikhual Villa hian minute 12-naah Evann Guessand hmangin goal an khung hmasa, chawlhlawk hmain mualneitu lamin Flavius Daniliuc hmangin an sut - a siamsaktu chu midfielder Xherdan Shaqiri a ni.

Aston Villa-in hnehna chan ngei an tum ngam, bench aṭanga luh tir Youri Tielemans chuan 2-1 a chakna goal a rawn khung; match thum chhung chu an substitute ten chakna goal an khung ta, coach Emery thluak a ṭha tih a chiang.

Brighton an hneh ṭumin substitute Donyell Malen chuan chakna goal a khung a, he inkhelah hian goal sarih lai a lut. Premier League hmahruaitu Arsenal an hneh ṭum pawhin bench aṭanga lut Emiliano Buendia chuan chakna goal a khung, tunah Tielemans-a hun a thleng ta chiah a ni.

Villa coach Emery chuan, "Arsenal kan hneh hnu khan kan rilru put hmang a danglam, khelmuala lut nih chakin player an inel nasa hle a, chu chuan rahṭha a chuah, inelna hianghlim leh ṭha chi a ni.

"Ka naute hian inrintawkna an nei sang ta hle a, team lian leh ṭha hmachhawn tur pawhin ka ringtawk. Thiamna leh theihna ringawt a tawk lo a, hnehna chan chaka an tuihalna hian min ti lawm hle a ni," tiin a sawi.

Spanish manager hian a player a siksawi nasa hle - Gunners hmachhawntu zing aṭangin Ezri Konsa, Matty Cash leh Amadou Onana te chauhin inkhel bul an ṭan nawn, player pariat ngawt siksawi an ni chungin an chak tho.

Emery chuan, "Season tirah kha chuan kan player neihte hi a tam thei ang ber inkhelhna hun siam kan tum a ni a, chutiang tur chuan an hnehah pawh ka hrilh. Tunah chuan kan thil tumte a hlawhtling cho ta niah ka ngai," a ti.

Season tirah khan Emery naute hian an match hmasa paliah goal an khung lo! Tunah erawh nasa takin an insiamṭha tawh, inelna hrang hranga an match hnuhnung 16 aṭangin vawi 14 ngawt an chak thei - European team hmuhnawm zinga mi an ni mek.

EPL table-a pathumna dinhmun luah thei Villa hian Pathianni zan dar 7:30 hian West Ham an lenchilh zui leh nghal dawn a ni.