Rafael Leao-a dinhmun a chiang lo

Pathianni zan tir dar 5:00 hian AC Milan chuan Sassuolo an hmachhawn dawn a, mikhual an thlen turah hian an player pawimawh Rafael Leao chu malpui hliam vangin an chhawr thei dawn lo niin a lang.

Serie A hmahruitu Milan hian karleh laihawl hian Napoli nen Italian Super Cup semifinal an khelh a ngai dawn bawk; league match bikah Leao hi inlan thei lo mah se Naples club hmachhawn turin Riyadh, Saudi Arabia-ah chuan a zin chhuah theih a rinawm.

Milan manager Massimiliano Allegri chuan, "Inkhel zawng zawng a pawimawh a, chuvangin player thlan dan pawh fimkhur taka kan kalpui a ngai. Vawi khatah hian match tam tak kan ngaihtuah thei lo, a indawt zelin kan ngaihtuah ang.

"Leao chauh a ni lo a, player dang pawh 100% dam chiang lo chung chuan an inkhel lui lo ang. Dam fel thuai se la, chumi hnuah chuan ṭha takin rawn inkhel leh vat se la tih hi kan duhthusam a ni zawk," tiin a sawi.

Milan hi tun hma chuan an ropui ṭhin, tun hnaiah erawh ropui takin an awm hleithei tawh meuh lo. Season kal laiah Serie A hma an hruai mek a, champion lai Napoli lak aṭanga nomawi chhuhsak tur chuan tha thlah loa an ṭan mar a ngai ang.