Bayern-ah Kane cham a tum

Harry Kane chuan Bayern Munich tana khelh chhunzawm zel a tum a, German champion chhuahsan tura a release clause tihnun theihna dan a neih chu hman a tum lo niin khawthlang media-te chuan an ziak.

Kane hian August 2023 khan Bayern hi Tottenham Hotspur aṭangin a zawm a, kum 2027 thleng khel turin contract a ziak. Mahse, a contract-ah hian a duh chuan pound maktaduai 57-a a chhuah theihna dan a inziak tel.

Mahse, he release clause hi tihnun ngai tura tih a ni thung. Kane hian chhuah a duh a nih chuan, January thla tawp hma hian Bayern hnenah a release clause hi tihnun a duh thu a hrilh a ngai. Mahse, English striker hian a release clause hi tihnun tumna a nei lo niin an sawi.

Hei mai a ni lo - Bayern hian a contract neih sa bakah, kum khat dang an hnena khel tura chelh an duh a, Kane hian contract thar ziah hi a pawi ti lo niin an sawi.

Kum 32 mi striker hian Bayern a pan hnuah match 119 khel tawhin, goal 113 a khung tawh a, Bayern tan chuan ani ang striker chelh theih hi duhthusam a ni.

Hetihrual hian Kane-a lakluh tum nia sawi Barcelona, Manchester United, Manchester City leh a club hlui Spurs tan chuan English striker thutlukna hi hriat a nuam lo khawp ang.

Kane hian tun season-ah ringawt pawh match 23 aṭangin goal 28 a khung tawh a, Bundesliga-ah point riat ngawtin hma a hruai falpui mek - Pathianni zan dar 10:00-ah league match khel turin Mainz an mikhual zui dawn a ni.