Manchester United tan inbuatsaih a harsa!

Manchester United-in zanin dar 1:30 hian Bournemouth an mikhual dawn a, AFCON avangin Ruben Amorim-a tan inbuatsaihna neih a harsa. Nimin thleng khan Bryan Mbeumo, Amad Diallo leh Noussair Mazraoui te an chhawr theih dawn leh dawn loh a chiang lo.

Amorim-a hote hian an match hnuhnung berah Molineux Stadium luhchhuahin Wolverhampton Wanderers 4-1 in an sawp a, inrintawkna an ngah sawt dawn. Chutihrualin player pawimawh pathum dinhmun hian an khelh dan turah nghawng lian tak a nei ang.

Mbeumo hian Wolves lakah goal a khung a, Amad pawhin a khel tluan. Amorim-a hnuaiah player pahnih hian hmun pawimawh an chang a, a bik takin Cameroonian forward Mbeumo hmunruak hnawhkhah a harsa dawn.

Portuguese manager Amorim chuan, "National team nen inbiakna kan nei a, tunah rih chuan kan bulah training turin an awm. Thil thlen theih an dan tur milin inbuatsaihna kan nei vek a, ngaihtuah tur a tam deuh. Player-ten a khel tur an la hre thei lo a, chu erawh a ṭhatna lai a awm," tiin Zirtawpni press conference-ah a sawi.

Chutihrualin Benjamin Sesko inhliam a dam tawh a, mahse Slovenian striker hi damlohnain (food poisoning) a tlakbuak avangin first team zingah training a nei lo a, squad-ah a la awm a rinawm loh zawk. Academy lama striker JJ Gabriel hming a rawn ri a, FA Youth Cup lamah che ṭha mah se kum 15 mi chauh a ni.

Tlarhnung lamah Harry Maguire leh Matthijs de Ligt te hliam vangin an khel thei dawn lo a, Wolves lakah pawh an inlan thei tawh lo. Luke Shaw, Ayden Heaven leh Noussair Mazraoui te kar liam ta khan an khel a; AFCON vanga Mazraoui a khel thei lo a nih chuan Lisandro Martinez leh Leny Yoro te chhawr theih turin an la awm. Tlarhma lamah Mason Mount a rawn che ṭha chho bawk.

Amorim chuan, "Bournemouth hi team ṭha an ni a, chutihrualin kan muala khel tur kan nih avangin chak ngei a ṭul," tiin point thum hmuh a inbeisei a, a khingpui manager Andoni Iraola a fak bawk. Cherries an match hnuhnung berah Chelsea an chelh thei a, table-ah erawh 14-naah an awm mek thung.