Chelsea an nui leh thei ta

Match li chhung chak hmel an hmuh loh hnuah Chelsea-in Inrinni zan khan Everton 2-0 in an hneh a, Cole Palmer leh Malo Gusto ten goal khat ve ve an khung. Blues hian hnehna an chan avangin table-ah palinaah an awm a, Enzo Maresca-a'n pressure a nei tlem sawt bawk ang.

Blues-in bul an ṭan ṭha a, minute 21-naah Gusto ball fing chu Palmer-a'n um lutin box chhung aṭangin cool takin a khung. Palmer hian Chelsea tan goal 39 khung chiahin goal 38 khungtu Nicolas Anelka chungah a awm a, club tana goal khung tam pakuana niin a chung chiahah John Terry (goal 41) a awm.

Chelsea inkhel a nung ṭha a, Alejandro Garnacho-a'n chance insiam turin thawkrim mah se a hmawr a bawk ṭha lo - goal ruakah a khung lo. Argentine forward hian second half-ah pawh chance ṭha a hlah.

Minute 45-naah Pedro Neto siam chu Gusto-a'n a khung a, first half-ah 2-0 a ni. Second half-ah Chelsea-in goal khung belh lo mah se an goal an venghim a, point thum hlu tak an hlawh chhuak.

Chelsea manager Enzo Maresca chuan, "Chance ṭhahnem tak kan hlah a, inkhel kan titawp mai thei lo. Mahse, inkhel pumpui thlir chuan ka lawm a, kan khel ṭha. Cole Palmer a tel hi chuan team ṭha zawk kan ni a, mah se hliam vangin match ṭhahnem tak a khel thei lo. Tunah chuan a rawn kir leh tawh a, a pawimawh khawp ang," tiin a sawi.

Blues hian December 16, Thawhlehni zan dar 1:30 hian League Cup quarterfinal-ah Cardiff City an hmachhawn dawn a, kartawpah Newcastle United an tlawh zui dawn. Maresca-a'n kar laihawlah Palmer a hahchawlhtir ang.