Wembanyama hoin Spurs an chak

Victor Wembanyama chu a hliam damin a inkhel leh thei tawh a, nimin zing khan a team San Antonio Spurs chu Oklahoma City Thunder lakah 111-109 a chak puiin NBA Cup final an lut.

Chawi vei lam hliam vangin Wembanyama hi match 12 ngawt a inkhel thei lo a, tunah chuan dam tawhin Thunder lakah hian point 22 a nei nghal a, an chak theih nan a thawhhlawk nghal hle a ni.

Minute 21 chhung chak la inlan mah se Wembanyama hian rebound vawi kua lai in assist ṭum hnih a nei bawk a, tun season hmang ṭha tak mai Thunder an hneh chhan langsar a ni.

Thunder hian season bul an ṭan fuh hle a, kuminah match 26 khel tawhin tun ṭum hi vawi hnih an chak lohna chauh a ni. Nimin zing inkhelah pawh hian rinkai zawk an ni, mahse quarter hnuhnung pahnihah an hniam zawkna tur a tawpah an tuar.

NBA Cup hi regular season chhunga mi a ni a, final tiam loin match dang zawng hi chu regular season match atana chhiar luh an ni; season hmasa khan Thunder hian final lo lut tawh mah se Milwaukee Bucks an hneh lo.

San Antonio hian final-ah chuan New York Knicks an tum leh ang. Knicks hian inkhel dangah Orlando Magic chu 132-120 in an lo hneh ve thung a, an chak theih nan point 40 neitu Jalen Brunson leh Karl-Anthony Towns (29 points) te an langsar hle.