Griezmann a la tar lo

La Liga match ruk ngawt a zawna an chak hnuah Atletico Madrid-in match hnih a zawnin hnehna an chang zo tawh lo a, Barcelona leh Athletic Bilbao lakah a zawnin an tlawm - tunah erawh an insiamṭha ve leh ta.

Atletico Madrid hian Pathianni zan khan an mikhual Valencia chu 2-1 in an hneh a, Antoine Griezmann-a'n kum 34 tling tawh mah se, a la tar lo tih pholangin chakna goal a khung a, a la hriam reng e!

Mualneitu Atletico hian minute 17-na lekah Koke hmangin goal hmahruai an khung a, minute 63-naah Valencia tan Lucas Beltran chuan si phurh sutna goal a khung. Mahse, Atletico tan Griezmann inlar ve lehin, minute 74-naah chakna goal a khung a, 2-1 in Atletico an chak.

Atletico-in hnehna an chan avangin La Liga table-ah palina an nih chhunzawm a, point 34 an nei mek - hmahruaitu Barcelona chu point sarihin an la phak lo mek a, Diego Simeone-a naute tan champion beiseina a la bo bik lo.