Hmahruai lailawktu PSG!

Season dang ang chu ni se la tun ang hunah chuan Paris Saint-Germain hi fal deuh takin Ligue 1 hmahruaitu an ni ngei ang, tun season erawh boruak a danglam - hma an hruaina pawh chhuhsak leh mai theih an ni rih.

Luis Enrique naute hian Inrinni zan khan Metz chu 3-2 in an hneh a, league match 16 an khelh aṭanga point 36 hmuin table chung berah an awm; an hnuaia mi Lens aiin point hnihin an sang zawk, mahse Lens hian match khatin an khel tlem thung, an hmabakah an chak chuan Paris club chungah an awm lehnghal ang.

Stade Saint-Symphorien-a inkhelah PSG hian goal khung an harsat hran lo - Goncalo Ramos leh Quentin Ndjantou te hmangin 2-0 in hma an hruai, a hnuah Metz midfielder Jessy Deminguet chuan a sut ṭhen.

Mikhual PSG tan substitute Desire Doue chuan a khung belh leh avangin hun tawp dawna Giorgi Tsitaishvili-a goal ṭha tak khungin awmzia a nei phak tawh lo, mikhual team lamin point thum an hlawh chhuak.

Luis Enrique-a'n hliam vangin a player ṭha Ousmane Dembele, Achraf Hakimi leh Marquinhos te a chawr thei lo vek, hetih lai hian rawlthar Ibrahim Mbaye (17) leh Ndjantou (18) te hmun an chang a, an hmuhnawmin rintlak an ni tawh tih a takin an lantir.

PSG manager Enrique chuan, "A bul kan ṭan fuh em em a, goal hnih pawh kan khung nghal mai. A lan danah kha chuan second half kha awlsam zawk tura ngaih a ni, mahse loh theih lohna avangin player kan siksawi a ngai.

"Kan khelh dan phung kan tih danglam a ngai bawk a, chu chuan nghawng a neih avangin a awlsam chhunzawm lo, a tawpah kha chuan harsa takin kan chak hram a ni," tiin a sawi a, a naute khelh danah a lungawi tih a sawi bawk.

Paris club tan tun ṭuma an match hi kumin atan chuan league match an khelh tawpna a ni tawh dawn. December 20, Inrinni zanah French Cup khel turin Vendee Fontenay Foot an tlawh dawn, chumi bak chu thlasik chawlh an nei dawn a ni.