Manchester City mikhual tur Brentford

League Cup quarterfinal-ah Manchester City-in zanin dar 1:00 hian Brentford an mikhual dawn. Pep Guardiola hoten season liam ta khan nomawi an chawi lo a, tun season-ah FA Cup, Premier League leh Champions League an champion ta lo a nih pawhin League Cup-ah tal champion an duh ang.

Tun hnaiah Man City an insiamṭha ṭan a, kartawp inkhelah pawh Crystal Palace 3-0 in an hneh. Brentford erawhin nipuiah player ṭha an chan a, Premier League-ah pawh table chanve hnuai lamah an awm. Bees hi kartawp khan Leeds United nen 1-1 in an inhnehtawk thung.

Man City hian League Cup hi an thunun ṭhin a; 2013-14 leh 2020-21 chhung inelna vawi riatah vawi ruk an champion. Mahse, kum 2021 final-a Tottenham Hotspur an hneh hnuah quarterfinal an kal pel thei tawh lo.

Guardiola hote hian tun ṭuma quarterfinal thleng turin Huddersfield Town leh Swansea te an hneh a, inelna hrang hrang match hnuhnung pangaa hnehna an chan tawh avangin inrintawkna an nei ngah dawn. Chutihrualin City-in Palace 3-0 a an hneh ṭum hian Eagles-in chance ṭhahnem tak an hlah a, an khelh dan thlir chuan Guardiola hote hi chesual ve thei reng an ni.

City khingpui tur Brentford hian quarterfinal thleng turin Bournemouth leh Aston Villa te an hneh a, Manchester United petthlatu Grimsby Town 5-0 in an sawp bawk. Brazilian forward Igor Thiago-a'n goal 12 a khung tawh a, City an barakhaih dawn a nih chuan Thiago hi a chet ṭhat a ṭul ang.