Como hnehtu Roma beiseina a nung

AS Roma chuan Serie A nomawi an beisei ngam tih chu a takin an lantir leh ta - Thawhṭanni zan inkhelah Roma hian Como chu 1-0 a hnehin point thum hlu tak an hlawh chhuak.

Stadio Olimpico-a inkhelah, team pahnihten goal khung an tum ngam a, na takin innawr mah se goal erawh an khung thei mai lo. Second half-ah Wesley Franca chuan goal awmchhun a khung.

Box sir aṭanga ball kal chu a sir lehlama awm Franca hian a chang fuh a, leihrulah a lirin a hlap lut pawp. Gian Piero Gasperini leh a nauten goal an venghim tluan thei a, mikhual lakah an chungnung ta a ni.

Roma coach Gian Piero Gasperini chuan, "Keimahni chauh ni loin kan khingpui pawh kha an khel ṭha hle. Como kha hmun awl siamsak chi an ni lo, remchang an hmuh zeuh kha chuan na takin min beilet nghal zel.

"Tun season match kan khelh tawh hoah chuan a ṭha ber a la ni hial mai thei," tiin a naute khelh danah a lungawi hle. Roma hian point 30 hmuin hmahruiatu Inter Milan an phak lohna chu point thum chauh a ni, an la inthlau lo hle.

Como coach Cesc Fabregas chuan, "Roma khan tharum an hmang nasa em em a, khatiang inkhel kha chu a awlsam lo. A tir aṭanga a tawp thleng khan ka naute an tlan tam takzet, kan tan chuan kawng kha a awlsam lo ve bawk a ni," tiin a sawi.

Beisei phak bakin season hmasa khan Como hi an che ṭha, tun season kal laiah pawh match 15 an khelh aṭanga point 24 hmuin pasarihna an ni mek - Italian football inelna sang berah hian team lian ni lo mah se a hmuhnawm leh hlauhawm zinga mi an ni phak.

Italy rama football inelna sang ber Serie A team ten kumin chhungin match hnih ṭheuh an la khel hman dawn, table chung lamah inhnaih tak tak an awm hlawm avangin kum thara hmahruaitu tur pawh rin thiam a la harsa hle a ni.