Hmeichhe tennis player ṭha ber Sabalenka

Women's Tennis Association (WTA) chuan kumin atana hmeichhe tennis player ṭha chawimawina a sem chhuak leh ta a, award ngaihhlut ber Women's Tennis Association player of the year atan Aryna Sabalenka thlan a ni.

Kum 27 mi Sabalenka hian tun season liam ta chhung khan nomawi pali a chawi a, ani aia la tam an awm lo - a title lak zingah hian US Open pawh a tel a, Grand Slam nomawi vawi li a chawi tling ta chiah.

Season tluan khan Belarus star hian final vawi kua ngawt a lut - Australian Open leh French Open final pawh a lut a, mahse Madison Keys leh Coco Gauff te lakah a vanduai zawkah a ṭang.

Kumin January khan Brisbane International-ah a champion ṭan a, chumi hnuah inelna ngaihhlut zinga mi Miami Open leh Madrid Open nomawite a la zui a, kum tluanin world number 1 dinhmun a luah thei.

Nikum pawh khan Sabalenka hian number 1 ni chungin kum tawp a lo hmang tawh, kuminah pawh a chung bera awm chungin krismas a hmang dawn, a phu ang ngeiin Women's Tennis Association player of the year pawh a zawnin a dawng.

July khan world ranking-ah point 12,000 a hmu tling hial - Serena Williams (2015) hnuah hmeichhe player zinga hetiang zat ranking point hmu leh thei hmasa hi a ni hial a, tun ṭuma award dawng tur hian vote tla 80% lai a hmu a ni.

Belinda Bencic chuan 'comeback player of the year' chawimawina a dawng thung. Swiss star hi kum 28 mi a ni tawh a, fa neih vanga thla 13 chhung ngawt tennis a khelh loh hnuin kuminah ṭha takin tournament a khel leh thei a ni.

Canadian tleirawl Victoria Mboko chu 'newcomer of the year' atan an thlang, Kum 19 mi Mboko hi season tirah khan chuan world ranking-ah 300 chuang a ni a, season a tawp meuh chuan 18-na dinhmun a luah phak hial.