Mizoram hmeichhe team-ten Tripura hneh

Board of Control for Cricket in India hnuaia inelna - BCCI Women's U-19 One Day Trophy Plate chu December 15, Thawhṭanni khan group match pahnihna khelh niin Mizoram chuan wicket 3-in Tripura lakah hnehna an chang.

Nagpur-a inkhelah hian, ṭhum vawra vannei zawk Tripura-in vuak hmasak an thlang a, over 50 chhungin run 153 an siam. Mizoram tan Jessica Lalmuanpuii'n wicket thum a la. Florence Beihropathaingia chuan wicket hnih lain, Jacinta Lalṭanpuii leh Zothanmawii Rokhum te'n wicket khat ve ve an la bawk.

Batting lamah Mizoram tan opener K. Lalnunfeli'n run 39 a siam a, Lalnunmawii'n run 27 siamin, Karie Chakma chuan run 19 a siam bawk. Baby Lalhmangaihzuali (15) leh Vanlalruatpuii (11) te'n thawh ve lehin over 48 chhungin an target umphain, run 154 siamin wicket sarih an hloh a, wicket thumin hnehna an chang ta a ni.

Mizoram hian match hnih khel tawhin an la chak ve ve a, point 8 hmuin table-ah pahnihna an ni mek. Anmahni ang thoa vawi hnih hnih chak Manipur chu NRR-ah an phak lo a, naktuk December 17 hian a sang pahnih hi an inkhel ang.