Inter Miami player thar Reguilon

Lionel Messi khelhna Inter Miami chuan man nei loin defender Sergio Reguilon an la lut - Tottenham Hotspur leh Real Madrid tan pawha khel tawh Reguilon hian kum 2027 December thleng daih contract a ziak.

Kum 28 mi Sergio Reguilon hi season hmasa tawp rual khan Spurs chuan an chhuah zalen a, a hnu lamah club a la nei leh lo; tunah chuan Major League Soccer club tan chona thar a hmachhawn dawn ta a ni.

Spanish defender chuan, "Inter Miami hi club hmasawn leh lian chak tak an ni a, inelna hrang hranga hlawhtlin chhoh zel tuma hma la mek an ni, hetiang hmathlir nei thui tak mai ka zawm thei hi ka lawm.

"Kei ngei pawh hi hmasawn duh mi ka ni a, engtik niah emaw chuan champion nomawi ka la chawi ve leh ngei ang tiin duhthu ka sam ṭhin, ka club thar tan hian chutiang hun chu ka tawn ngei pawh ka ring," tiin a sawi.

Reguilon hian kum 2020 September khan Real Madrid atangin Tottenham a zawm a, North London club bakah hian Manchester United, Atletico Madrid leh Brentford tan loan hmangin a khel tawh bawk.