Ben White a chawl leh rih dawn

Arsenal defender Ben White chu Wolves an hneh ṭum khan a malpui a hliam a, a chawlh chen tur hi sawi chian theih la ni lo mah se thla khat bawr vel chu a chawlh rih a ngai dawn a ni.

Wolves an hmachhawn ṭum khan White hi minute 31-naah thlak a ni a, a hliam vang hian Myles Lewis-Skelly chuan a rawn thlak; Mikel Arteta chuan malpui hliam a nih thu hi a sawi chiang nghal.

Season hmasa aṭang khan khan White hi hliam vangin a buai fo, tun season tir lamah pawh a inlan tam tawk lo. Tun hnaiah a inkhel tam - Arsenal hi ni 10 chhung match pali ngawt an khel a, an player an hah tih a chiang.

William Saliba dam tawh mah se Gabriel Magalhaes chu kumin chhung a inkhel thei dawn tawh lo niin a lang a, tlarhnung lamah Arteta tan duh thlan tur an tlem sawt bakah Brazilian defender hi an rinrawl a ni.

Defender dang Cristhian Mosquera pawh kerek hliam vangin nakkum January laihawl thleng a chawlh a ngai dawn. Saliba leh damkawr Jurrien Timber te chungah mawhphurhna a sang dawn.

Tun kartawpah Gunners hian Everton an tlawh dawn, chumi hnuah Crystal Palace nen Carabao Cup quarterfinal an khel ang, kumin chhungin Brighton leh Aston Villa te an la hmachhawn leh hman dawn bawk a ni.