Chelsea-in nomawi an hnaih leh ta

Europa Conference League leh FIFA Club World Cup-a Chelsea champion puitu Enzo Maresca-a'n Chelsea tan nomawi a chhawp hnai leh ta - Thawhlehni zan khan League Cup semifinal an lut.

Chelsea hian League One club Cardiff City chu 3-1 in an hneh a, Alejandro Garnacho chuan goal hnih khungin, Pedro Neto chuan goal khat a khung bawk.

Cardiff tan David Turnbull chuan minute 75-naah khung ve mah se, awmzia a nei phak lo a, Chelsea an chak. Match li a zawna an chak zawh loh hnuah, match hnih a zawnin Blues an chak ve leh ta.

Inrinni zan dar 6:00-ah London club hi Premier League match khel turin an inlan zui leh dawn a, an lenchilh tur hi Newcastle United an nih dawn avangin Chelsea tan hmabak a harsa lehnghal dawn.

Chelsea & buaina

Blues coach Enzo Maresca-a'n Everton laka 2-0 a hnehna an chan hnu lawkah, hriatthiam theih tak turin ṭawngkam a nei a, "Chelsea ka zawm hnuah, kan inkhelh hma darkar 48 kha ka hun tawn hrehawm ber a ni - thlawptu kan nei lo," a ti.

Maresca ṭawngkam hi club thuneitu lam a beihnaah an ngai a, League Cup-ah result ṭha danga a chhunzawm avangin ban lam erawh an la ngaihtuah rih lutuk lo mai thei.

Mahse, Thawhlehni zan inkhelah Chelsea hi an chesual teuh hle. Player siksawi hrat tak Maresca-a'n Everton laka bul ṭan 11 chu a thlak danglam hlawk a, first half-ah kha chuan a tifuh dawn lo niin a lang hman.

Chelsea inkhel a nung tawk lo a, boruak dul tak karah League One club an rum ṭhaih hleithei lo a ni ber. Goal lut miah loin chawlhlawk hman a ni a, League One club laka khelh dan turah chuan duhthu a sam lo takzet.

Danglamna Garnacho

Chelsea boss Maresca-a'n player siksawi an ngai tih a hmu thiam vat a, second half ṭantirah Garnacho leh João Pedro te luhtirin, inkhel boruak a danglam nghal.

Blues goal nawr a na sawt a, tlarhmaah an hmuhnawm - minute 57-naah Cardiff centre back Dylan Lawlor a che sual a, a hmaa ding Facundo Buonanotte chu ball a pass!

Kum 20 mi attacking midfielder hian ball hi chak taka tlanpuiin, a sira vengtu nei loa tlan lut Granacho hi ball a pe zui a, Argentine forward hian harsatna nei loin goal-ah a chantir.

Mahse, Chelsea-in goal dang an khung lawk lo a, minute 75-naah hremin an awm zui. Perry Ng-a ball cross ṭha zet chu David Turnbull chuan a tauh lut a, 1-1 a ni.

Chak duh Blues

Chelsea-in League One club khelmuala chak zawh loh an duh lo a, an insiamṭha vat. Minute 82-naah Pedro Neto a inlar a, Andrey Santos-a siamsak chu an goal hnihna ni turin a khung.

Minute 90 thlengin goal dang a lut lo a, 2-1 in Chelsea hi an chak mai dawn niin a lang tawh. Mahse, Garanacho-a'n a lo la duhtawk lo a, chak nemnghehna goal a khung.

Tun season League Cup-a semifinal lut hmasa ber an ni a, nizan lamah Manchester City vs Brentford leh Newcastle United vs Fulham an inkhel a, result kan hre hman lo.

Arsenal pawhin quarterfinal lut mah se, an hmachhawn tur Crystal Palace-in tun karah Europa Conference League an khelh dawn avangin an inkhel thei rih lo a, Krismas Urlawk zana inkhel tura ruahman a ni.