Blues-ah ka hlim - Maresca

Everton an hneh hlima a ṭawngkam avanga Chelsea-a hlim lo anga sawi Enzo Maresca chuan London club-ah a hlim thu a sawi a, "He club-ah hian ka hlim a, player-te nen pawh kan inpawh lehzual," a ti.

Cardiff City an hneh zawha media a hmachawnnaah Maresca chuan fans ho sawisel anga an sawina pawh chhangin, "Press conference tam takah, vawi tam ka lo sawi tawh. Chelsea fan-te hian min thlawp reng a, kan mamawh laiin an awm reng ṭhin.

"Chak lohte chuan khawvela eng club fans pawh an lungawi lo ṭhin alawm! Anni pawh chutianga lawm loh chang chu an nei ngei a, mahse, chu chu thil nihphung ve reng a ni. A pumpuia thlirin, kan fan-te hian min phatsan ngai lo," a ti.

Italian coach chuan an inkhel chungchang sawi zuiin, "Zanina kan match ang kha thlir ila, hetiang hunah hian ka player-te ka duhna leh ngainatna hi a zual ṭhin. Zanin ang kha chu awlsam taka chetsual theihna, hriatthiam har tak a ni ṭhin," a ti a, an chak chu a lawm hle.

Maresca hi club thuneitute nen pawh an inkar ṭha lo anga sawi a ni a, kum 45 mi manager chuan, "Zanina a pawimawh ber leh, rilru kan dahna tur chu semifinal kan lut hi a ni. Fan-ten min thlawp reng bawk.

"Kawng dik kan zawh zel. He club tana ka thiltih reng reng hi fans, players, kan vaia kan ṭhat tlanna tur ka duh vang a ni zel," a ti a, Chelsea a dah pawimawh ber thu a sawi.