MLS lamah Lewy a pem dawn

Major League Soccer club Chicago Fire chuan Barcelona striker Robert Lewandowski chu lakluh tumin an dawr mek a, an inbiakna hi a kaltluang hle niin khawthlang media-te chuan an tarlang.

Kum 37 mi striker hian season tawp rualin Barca-ah a contract a hmang zo dawn a, amah ber pawh hian USA lama pem a hreh lo nia sawi a nih avangin Chicago tan hian a khelh ngei hmel.

Barcelona tana match 164-a goal 109 khung thei Lewy hi aman a duh chuan Barca-ah pawh a cham thei nia sawi a ni a, Saudi Pro League leh MLS club dang hming pawh sawi tel a ni.

Mahse, MLS bikah chuan Chicago hian an 'discovery list' ah an telh tawh a, club-in hetiang list-a an dah tawh chu MLS danah, MLS club thoin an lo dawr ve thei tawh rih lo - Lionel Messi khelhna Inter Miami pawhin an duh ve niin an sawi.

MLS champion Inter Miami hian an defender Jordi Alba chawlh tak avangin, player langsar la lut turin hmun ruak an nei a, mahse, tunah chuan Chicago leh Lewy inbiakna tlawlh hun an nghah phawt a ngai a ni ber.

Tun season-a Barca tana match 17-a goal riat khungtu striker hi Borussia Dortmund leh Bayern Munich lamah pawh a lo hlawhtling viau tawh a, US pan tur hian hlawh chungchangah buaina a awm lo niin an sawi.